Hokkie

Hoërskool Swartland het die laaste paar jaar baie aandag aan hokkie geskenk en is tans besig om die vrugte daarvan te pluk.  Ons bevind ons op ‘n kompeterende vlak met die meeste van die topskole in die Boland.  Die skool lewer elke jaar ‘n hele paar Bolandspelers op en daar is ‘n merkbare positiewe groei in die aantal spelers.

Die o.19A-seuns- en dogtershokkiespanne neem jaarliks aan die Fairmonttoernooi deel, waar hulle teen die meeste van die topskole in die Wes-Kaap kompeteer.  Die o.16A-seunshokkiespan neem ook elke jaar deel aan ‘n toernooi by Hoërskool Paarl Gimnasium en die 0.16A-dogtershokkiespan neem aan die Spar Challenge deel.

Aan die einde van 2019 is ‘n suksesvolle “six-a-side”-toernooi aangebied, wat saans onder die nuwe spreiligte plaasgevind het.  Daar word beoog om hierdie ‘n jaarlikse instelling te maak.

Alle spanne kry geleentheid om op die astrobaan te oefen en alle A-spanne speel al hul tuiswedstryde daarop.  Die baan word ook tydens die week gebruik vir ekstra klinieke en twee van die dorp se laerskole word op geskeduleerde tye uitgenooi om daar te oefen.

Addisioneel tot die gewone sportdae, wanneer die skool hokkie, netbal en rugby teen ‘n spesifieke skool speel, vind daar gereeld ekstra hokkiewedstryde teen skole soos Paarl Gimnasium, Hoër Jongenskool Paarl en Bridge House plaas.  Wanneer moontlik, speel die toepaslike spanne ook wedstryde teen spanne wat vanuit die buiteland toer.

Addisionele inligting:

Hoof van Hokkie: Mnr. Francois Lourens
E-pos: swartlandhockey@gmail.com